Bhí sí (an bhruitíneach) amach maol dearg thríd le cupla lá, ach tá sí fuaraithe inniu = gan í a bheith cho dearg; é a bheith dhá sú; í ag dul ar gcúl

Bhí íth orm ach tá sí fuaraithe anois

An teánn ab ea atá air? Ara is gearr go bhfuaraí sí sin le cúnamh Dé

An bhfuil an lot atá ar do chois fuaraithe fós? … Ceadh nach bhfuil? = gabhtha ar gcúl; an t-óthras a bheith imithe as, agus é a bheith i mbéal bisigh nó cneasaithe

An bhfuil na hoighreachaí fuaraithe ort inniu? Is gearr go mbeidh tú amuigh faoin bhfuacht aríst mar sin

Tá fuarú breá aige (ón tinneas, pian etc.) ó thránóna

Níl aon-fhuarú agad inniu, nó an bhfuil an phian ag cothú san ngiodán céanna? … Sin é do mhaith muise má tá sí ag smearadh amach

Bhí mé ag strócadh le pian ar feadh na hoíche ach tháinig fuarú beag dom teacht isteach an lae

Tá bun-fhuarú maith ar an bhfiabhras inniu air, a chuala mé. Chuaigh sé thrí aoithiú inné agus arú inné. Comhairim go bhfuil an báire leis le cúnamh Dé

An bhfuil aon-chosúlacht ar an mbruitíneach fuarú air sin? Tá sé in am sin aici feasta

Is deacair leis an ngrís sin fuarú. Is olc an éadáil atá ort muis. Beidh sí sin (an ghrís) in a lionnán agad go bhfeice tú tamall

Bhí an-chaint aige athrú na chéad-laethanta, ach tá sé fuaraithe as anois. B'fhéidir go bhfuil sé ar a sháimhín sógha san áit a bhfuil sé

Fuaróidh sé as an gceird sin muise ach a bhfeice sé nach bhfuil aon-tsamhaoine inti. Ní bheadh an sionnach fhéin suas leis sin ná le aonduine dhá dhream

Tá fearg air anois. Leig dó fuarú (as). Annsin teirigh chun cainte leis

Bhuail an-olc é, ach d'fhuaraigh sé (as) aríst ar an toirt. Duine taghdach mar sin é

Tá na sean-amhráin ag fuarú as agus amhráin nua ag teacht in a n-áit = ag imeacht; táthar ag eirí asta

Tá na sean-ghnásanna sin ag fuarú as anois. Meastú ar cuireadh aon-chrasóg Bhríde suas againne ó d'aistrigh muid go dtí an teach nua? Dheamhan é muis. Tá na daoine atá ann anois ro-fhaillíoch faoi bhealaigh den tsórt sin

Ní bheadh breith bonn báis aige gan a dhul chuig an damhsa nó gur chuala sé go raibh sé seo thíos le dhul ann. D'fhuaraigh sé as annsin

Bhí an-tóir ar an ól aige ach d'fhuaraigh sé as go mór le goirid

Shílfeá gur mhó dhá fhonn a bhí air a dhul ag smísteáil na ndaoine, ach gur fhuaraigh sé as aríst

Tá sé fuaraithe go mór san mbeannaíocht ó thug sé faoi deara a dhul ag cúirtéaracht = leighe aisti, lagha inti

Ba sclábhaí maith a bhí in a athair. Ach é fhéin, níl ann ach an rith searraigh. Fuaraíonn sé san bpoll céanna a dtéann sé ann

Tá an-taghd ann ar an gcaoi sin. Ní fhaca tú aonduine ariamh is túisce a thiúrfadh "thug tú th'éitheach" dhuit ná é. Ach ná cuirtear araoid ar bith air, agus beidh sé chun míneadais aríst ar an toirt. Fuaraíonn sé san bpoll céanna a dtéann sé ann. Dheamhan cuimhne a bheadh aige aríst air le ionntú an tsoip. Sin í a intinn. Níl neart aige air

Seán Ch. a raibh tú ag caint leis. Gheall sé an saol duit 'ar ndó?? … Gheallfadh sé. Ní raibh aon-cheo dhá chur ar siúl annseo ariamh nach air a bheadh chuile chúram faoi chun tosaigh, ach ní fheicfeá ón gcéad-oíche nó ón darna hoíche amach é. Bíonn an-spleódar mar sin ann ach fuaraíonn sé san bpoll céanna a dtéann sé. Tá sean-aithne agamsa air sin a stór. Rachaidh mé faoi dhuit nach bhfeicfidh tú níos mó é

Ní fhaca mé fear ar bith ariamh is gasta uaidh leoraí amháin móna a bhaint ná é. Ach tá sé in a phuca uaidh sin amach. Fuaraíonn sé aríst san bpoll céanna a dtéann sé

Shílfeá le breathnú air ag fódú an chéad-iomaire go ndéanfadh sé cat agus dá rioball de rith agus de léim. Ach ní dhéanann. Fuaraíonn sé san bpoll céanna a dtéann sé. Ní buan tréan, adeir siad agus ní den abhras an chéad-shnáth

Cén t-olc atá ort liomsa? Céard a rinne mise ort? An agamsa atá neart ort? Fuaraigh anois san gcraiceann céanna ar théigh tú ann cheana.

Ara nach furasta leis eirí suas in a choileachín ag na daoine! Ná tugtaí áird ar bith air. Cead aige fuarú san gcraiceann céanna ar théigh sé. Sin é an gléas air

Bhí an gaiscíoch mór seo thoir ann agus é féin spréachta. Ach níor cuireadh chuige ná uaidh. Bhí a chead aige fuarú san gcraiceann ar théigh sé

Shíl sí go gcuirfinnse suas coc léithi agus go mbeadh an-tsásamh aice a dhul ag sciolladh orm, mar sin biadh agus beatha di sin. Ach níor dhúirt mise drúcht ná báisteach léithi, ach a dhul ceann ar aghaidh in mo ghnatha, agus d'fhága mé ise ag fuarú san gcraiceann céanna ar théigh sí. Dhá bhfádh sí sin an té a choinneódh ropaireacht léithi, sé a mbeadh uaithi é

Breá ar bhac tú leis duth ná dath, agus d'fhuaródh sé san gcraiceann céanna ar théigh sé ann roimhe sin. Bhuail tusa foracún air, agus beidh sé de shásamh aige ort go bhféadfaidh sé thú a thabhairt chun cúirte. Ara bheinnse dhá lá mo shaoil ag éisteacht len a chuid dodaireacht sin, agus ní leigfinn orm fhéin go gcloisfinn chor ar bith é. Air fhéin a bhíos an t-anró