Tá an bhean sin aige an-diomalach. Ar ndóigh, níl a fhios céard a ligeas sí amú. Cén bhrí dhá mbeadh aon ghanntan beatha orthu, ach níl. Tá a cuid muc agus a cuid cearc agus a cuid beithíoch i gcónaí ag géimneach agus ag grágaíl agus ag sclamhaireacht leis an ocras, agus an rud a bhí a thabhairt dóibh scuabtha leo ag madraí an bhaile den tsráid

Rug sí orm i lár na sráide agus phóg sí agus dhiurn sí mé os comhair na tíre. Ní thabharfainn deoir fhola le náire. Cén bhrí nó gur thosaigh sí ag caint: 'a mhac mo chol ceathar, a mhac mo chol ceathar nach bhfaca mé leis an fhad seo …' Mo choinsias is dar m'anam, níor tháinig aon lá ariamh mar é ar shlata an bhaile mhóir, agus cáir ar chuile fhear