Bhí sé ag dul thar abhainn agus chonaic sé madadh

Chuaigh sé thar abhainn

An dtéann a chuid talúna thar bóthar (thar an mbóthar)

Ní fhaca mé ariamh é féin ná aon duine dhá dhream nach mbeidís ag dul thar tórainn

Gabhfaidh mé thar farraige go gairid — go tír eile

Tá an claise ag dul thar bruach

Gabhfaidh an cléibhín sin thar maoil má chuireann tú mórán eile ann

Tá an teach ag dul thar drad lena bhfuil de dhaoine ann — tá sé ag dul thar maoil

Chuaigh an ghloine thar buinne bruach lenar chuir sé inti

Chuaigh sé thar mar ba cheart dó a dhul leis an bpoitín

Ná téirigh thar mar is feiliúnach duit a dhul anois leis an ól

Ní féidir le saighdiúr a dhul thar a ordú

Cén uair a chuaigh póilí thar an rud adéarfadh a chuid comhairleachaí leis

Ná gabh thar m'aithne anois — thar an rud adeirim leat

Chuaigh sé thar chrois na ndaoine — na rudaí a bhí ráite acu; nó rudaí ar chuir na daoine bacainn orthu (fc. crois)

Chuaigh sé thar smacht baile agus muintire

Níor lig an faitíos dó a dhul thar smacht Sh.

Ní dheachaigh sé thar an gceart chor ar bith. Choinnigh sé guaim mhaith air fhéin. Dhá mba mise a bheadh ann, bheadh sé buailte agam gan éisteacht ar bith

Más leat gan a dhul thar an bhfírinne, níl agat é sin a tharraingt anuas chor ar bith. Ná bac leis

Má ghníonn muid sin beidh muid ag dul thar ghreann. Deir siad nuair is fhearr an súgradh gurb ea is fearr ligean dó

Má rinne sé sin, chuaigh sé thar thútaíl fhéin — rinne sé thar a bheith tútach é

Ní fhaca mise a mhacasamhail ariamh. Chuaigh sé thar phéisteántacht

Chuaigh sé thar a bheith ina spóirt nuair a thug tú cic sna heasnacha dhom

Tá sé ag dul thar mhagadh (nó, thar a bheith ina mhagadh) anois, agus b'fhearr éirí as sílim

Chuaigh sí thar a maith fadó — tá a maith caite aici le fada

Sin é do dhíol. Níl aon dul thairis sin. Éirigh as anois

Ní raibh aige a dhul thairis sin, ach dúirt sé a raibh ina bholg nuair a bhuail an spadhar é. Sílim go ngabhfaidh a chuid cainte daor air, go ngabhfaidh sin

Níl tada ag dul thar a luach anois ach feoil. Tá sí ina hór

Níl aon dul thar an ngiúistís a mhic ó, nó má tá, is duine dícéillí a ghabhfadh thairis. Dhá dtugtása é sin go hardchúirt agus dhá gcaití aríst thú, bheifeá dhe dhroim tí. Is tú a bheadh

Níl aon dul thar an rud adéarfas an sagart. 'Sé béal na fírinne é

Má dúirt sí sin, níl aon dul thairti. Sin í an comhairleach

Diabhal mé go mb'éasca a dhul thar an máistir a bhí ansin cheana. Bhí sé an-lách le na gasúir, agus deir siad go mba togha máistir é ina dhiaidh sin. Brúisc é an fear seo

Níl sé an-deacair a dhul thar Th. dhá mbeadh duine díreach chor ar bith leis agus é a íoc nuair a bheadh sé aige. Is minic a tháinig sé ansin ceathair nó cúig de chuarta agus a d'imigh sé aríst agus a dhá láimh chomh fada le chéile. Ach dheamhan smid adéarfadh sé ina dhiaidh sin, ach 'b'fhéidir go mbeadh sé agaibh nuair a chasfaí an bealach aríst mé'

Is furasta a dhul thar an ngiúistís seo má tá duine réasúnach chor ar bith. Ní mórán fineannaí troma a chuaigh suas chor ar bith ó tháinig sé ann. Chuir sé príosúntacht ar dhuine anseo agus ansiúd, ach nár thuill siad é?

D'fhéadfadh duine ar bith a dhul thar an sergeant sin murab é a chiontsiocair féin é. Duine an-réidh é an sergeant. Ach tá dream ann nach beo iad mura mbeidh siad ag gleo agus ag bruíon agus ag cur na tíre thrína chéile

Bíonn sé ag sclamhaireacht leis mar sin, ach gan aird ar bith a thabhairt air. Is furasta a dhul thairis, mura lige tú ort féin go gcloisfidh tú chor ar bith é. Ba é an t-athair a bhí géar ar bhuachaillí aimsire go ndéana Dia grásta air!

Is furasta a dhul thairis ag daoine. Níor mhiste do chuid de na daoine dhá mbeidís gan aon phínn a thabhairt dó chaon deich mbliana, dheamhan a leanfadh sé faoi iad, ná a bhfuil a fhios agam an iarrfadh sé amháin é. Ach dar brí an leabhair, tá sé an-éadóchasach le daoine eile (fc. éadóchasach)

Ní raibh aon chall duit tsiocair ar bith a thabhairt duit féin. Bhí an méid sin le t'aghaidh. Ní raibh a dhul thairis agat

Bhí a lá caite. Ní raibh a dhul thairis sin aige

Nuair a bheas do sheal tugtha, ní bheidh a dhul thairis sin agat. Caithfidh tú imeacht más olc maith leat é

Má bhí sé romham, ní dheachaigh mé thairis. Chaithfeadh sé go ndearna sé an dubhdheifir

Má chuaigh sé suas, ní fhaca mé é ag dul thar an teach

Bhí mé gaibhte thairis shula d'aithin mé é

Ní dheachaigh sé thart ar feadh an bhóthair aníos!

Thiocfadh dó a dhul tharainn i ngan fhios, ach má chuaigh níor thug muid faoi deara é

Cá ndeachaigh sé tharaibh. Ag Gleann an Gh. Bh. ab ea?

Chuaigh mé thar go leor lochannaí an taobh ó thuaidh den bhóthar

Tá an tslinn ag dul amach rófhada thar an mballa

Tá cois leis ag dul amach thar an gcois eile

Ar an dá luath is a bhfaca sé an fuisce, thosaigh a theanga ag dul amach thar a bhéal

Deir tú leis a chuaigh amach thar mo chluais — scoith sé mé agus choinnigh sé an-ghar dom, fearacht is dá mbeadh sé ag tabhairt mo dhúshláin

Chuala mé ag dul tharam é, ach níl a fhios agam an fíor bréag é. Thiocfadh dó gurb é an fhírinne é mar sin féin

Meas tú an mise atá dhá chumadh. Is beag an baol. É a chloisteáil ag dul tharam mar sin: sin é a bhfuil d'údar agamsa leis. Más fíor nó bréag é, ní deas an scéal é ar chaoi ar bith

Dheamhan a fhios agamsa ó ardbhonnaíochaí an diabhal céard is cor dó, agus is cuma liom ach an chaint sin a chloisteáil ag dul tharam. Is beag an chluais a thug mé don scéal, ach tá mé dhá inseacht duitse anois mar a chuala mé fhéin é, gan focal a chur leis ná a bhaint uaidh

Ná bac liomsa ná le mo chuid creathnaigh. Tá creathnach ag dul fúm is tharam chuile lá, ach ní móide go gcreidfeá mé má dheirim leat nach ndeachaigh aon cheo dhe ar mo bhéal le deich mbliana. Tá sé chomh fairsing againne agus nach bhfanann leath suime againn ann

Bíonn báid aeir Mheiriceá ag dul fúinn is tharainn chuile oíche. Níl mórán oíche ar bith nach n-airíonn muid ag dul thart iad — ag teacht isteach ón bhfarraige

San áit a gcónaímse tá cnónna ag dul fúm is tharam. Tá an áit faoi choll agus faoi chreigeanna agus faoi rosáin ar fad. D'fhéadfainn buta a chur chugat uair ar bith má tá aon tsaint agat iontu

Go dtuga Dia ciall duit! Tá obair ag dul faoi is thairis chuile lá san aer, ach is fhearr leis ag cothú na splaince ina dhiaidh sin ná a dhul amach agus buille eicínt a dhéanamh. 'Sé an díomhaointeas a bhuac sin, agus ba é ariamh

Nach bhfuil airgead ag dul fút is tharat san áit a bhfuil tú má tá sé de rath ort a shaothrú. Tá an oiread criathraigh ansin thuas agat agus nach bhfeicfidh tú ídithe go brách é. Breá nach mbaineann tú móin? Tá daoine thart ansin ar na bailteachaí ag stróiceadh ag iarraidh fir fánaí agus ní ghabhfá leo

Ní díol trua ar bith é fear na tíre seo dhá bhfaigheadh sé ocras féin. Nach bhfuil beatha ag dul faoi is thairis. Tá neart faochan agus bairnigh agus cnuasach cladaigh ansin thíos (sa gcladach). Tá neart éisc ansin amuigh ar an gcuan, dhá mbeadh sé de rath air a dhul ina dhiaidh. Tá na breaclachaí sin beo le coiníní dhá gcuireadh sé d'anró air féin súileanna ribe a chur. Cár fhága tú a bhfuil de sméara agus de chúrláin agus de thorthaí eile timpeall ansin. Is mór a thabharfaí orthu in áiteacha eile dhá mbeidís ann, ach níl

Bhí damhsaí ag dul faoi is thairis ariamh, agus ainneoin sin, sílim dheamhan coisméig aige. Níor thug sé faoi deara dhó féin a dhul ag aon damhsa ariamh. B'fhearr leis istigh ag saighdeadh faoi sheanriadairí agus ag fáil spraoi orthu

Nach bhfuil cigarettes ag dul fúibh is tharaibh thoir ansin. Chuala mé go mbíonn siad go barr bachall tigh Mh. i gcónaí. I nDomhnach téann dream as seo soir i gcónaí ann nuair a bhíos siad astu san áit seo, agus níor chuala mé gur heitíodh ariamh iad

Ní raibh ag dul fúithi ná thairti ach sagart a dhéanamh den mhac sin, ach féacha an deis atá anois air: ina chiseach le ól i chuile áit. D'éireodh di croí dubh féin a bheith aici. Thóg sí é sin go muirneach — rómhuirneach b'fhéidir

Níl ag dul faoi ná thairis anois ach píosa talúna a fháil isteach i gcluasa an bhaile mhóir go dté sé ag garraíodóireacht agus ag cur greens. Dar leis, déanfaidh sé saibhreas ar mheacna, ar oinniúin agus ar an ngabáiste chatach sin. Ach dheamhan a fhios agam. Is fusa na rudaí sin a rá ná a dhéanamh

Ar ndóigh níl ag dul fúm ná tharam ach é. Bhí mé le n-imeacht an t-am ar ghlan J. C. leis, ach chuaigh an tseanbheirt go bog agus go crua orm agus chaith mé as mo chloigeann aríst é. Faitíos atá orthu faoi na rudaí nua seo atá ag teacht anall — an V2 — ach má tá an t-imeacht ar dhuine 'sé an cás céanna dhó cá mbeidh sé. Is maith gasta a mharófaí duine sa mbaile freisin

Ní raibh ag dul faoi ná thairis leis an fhad seo ach léasadh a thabhairt d'E. 'Nuair a bhéarfas mise air cuirfidh mise faoi ndeara dhó, feicfidh sé féin air.' Ina leaba sin, 'sé E. a thug an léasadh dhósan lá an aonaigh. Thug agus léasadh diabhalta

Ní bhíonn ag dul fúm ná tharam chuile oíche ach scríobh aici, ach níl oíche ar bith nach mbacann rud eicínt ina dhiaidh sin mé. Chinnfeadh ort tada a dhéanamh sa teach s'againne aon oíche ag bratainn agus ag sconmhíol an bhaile ag éirí in airde agus ag gleo

Bhí mé i nG. le trí Shatharn anois agus 'sé a raibh ag dul fúm is tharam chuile Shatharn, miodachín eicínt de scian bheag a cheannacht a ghearrfadh mo ghráinne tobac dhom. Agus meas tú ar fhéad mé cuimhneachtáil uirthi lá ar bith ina dhiaidh sin

Ní raibh ag dul fúm ná tharam ó mhaidin ach sciorradh suas go bhfeicinn cén chaoi atá ar an tseanbhean seo thuas, ach bhí an oiread le déanamh ina dhiaidh sin agus nach bhfuair mé ionú air. Dhá mbeadh na seacht sraith ar an iomaire, gabhfaidh mé ag breathnú uirthi amárach. Níor chomaoin dom a dhul; ba mhaith í fhéin nuair a bheadh an t-anó ar dhuine. Diabhal bréag nár mhaith

Ní raibh ag dul faoi ná thairis nuair a bhí muid i M. ach a dhul isteach go B. L. go dtéadh sé ag breathnú ar Mh. Dh. 'Meas tú cén t-am a mbeidh muid sa mbaile,' arsa mise. 'Ar maidin,' adeir sé. 'Má théann muid ann, ní ligfidh siad abhaile anocht muid'