Tá an tsáinn siúd ar fad faoi dhriseachaí. Chaithrigh siad amach ann le blianta beaga anuas cheal a mbainte

Níl aon gharraí ag gabháil linn nach bhfuil lomlán le driseacha

Níl rud ar bith dhá bhfuil ag fás nár chuir Dia maith eicínt inti. Más í an dris féin í, déanfaidh sí ursachaí agus gadrachaí agus simléir agus bonn cruaiche. Diabhal mé gurb iomaí rud a dhéanfadh sí dhá gcomhairtheá suas anois é

Tá sé ag baint driseachaí le haghaidh bonn cruach choirce

Dhá bhfaighteá crígh a mbeadh driseachaí stalcánta inti 'siad a d'fheilfeadh duit faoi chomhair an tsimléir

Bhí mo sheanathair ag teacht abhaile Oíche Shamhna fadó. Tháinig an púca faoi ansin thiar i nG. Bh. D'ardaigh sé leis é agus níor chónaigh sé gur chaith sé isteach i gcrígh driseachaí é thiar faoin bP. (fc. crígh)

Tá an garraí gleannach anois in aon chora amháin driseacha. Chonaic mise an t-am nach raibh aon dris ag gabháil leis, ach a mbíodh sé saothraithe chaon tríú bliain. Ach lig an fear seo atá ann anois i léig é. Is maith an stócáil nár mhór a dhéanamh ann anois le go bhféadfaí a chur

Níl aon ghnaithe agat an t-aistreán sin a thabhairt ort féin. Má bheireann na driseachaí siúd ort, ní thabharfaidh tú folach de do cheirteachaí slán as choíchin. Más cam díreach an ród, 'sé an bóthar mór an t-aicearra, a mhic ó.

Níl liobar leathair fágtha orm ag driseachaí ó maidin. Bhí muid ag fiach i ndiaidh coiníní soir ansin

Tá paicle abhlóirí ansin thíos agam agus bheadh sé chomh maith dhuit a bheith ag caint le dris lena bheith ag caint leo. Níl ann ach a scaoileadh isteach i gcluais agus amach sa gcluais eile. Chaith mé eadarshuth inné ag iarraidh a gcoinneáil anoir ón S. ach mo chreach. Is beag an aird a thabharfas siad sin ar mo ráitese

Go dtuga Dia ciall duit! Níl tú ach ag cur do chuid cainte amú leis siúd. Tabharfaidh sé toradh ort go deimhin. Bhí sé chomh maith dhuit go díreach glan a bheith ag caint le dris lena bheith ag caint leis siúd

An bhfaca tú aon diabhlánach ariamh is neamhairdiúla ná P. siúd. Bhí sé chomh maith dhuit a bheith ag caint le dris le bheith ag caint leis. Chaithfeá uair ag cur caoi ar rud eicínt dó, agus nuair a bheadh sé ceartaithe ar fad agat, sin é an uair adéarfadh sé: 'céard adeir tú'

Thug sé soiscéal don inín faoina bheith ag dul chuig na céilíochaí, ach mo léan géar, b'fhearr dó a bheith ag caint le dris ná a dhul ag bacadh leis an ainle bhradach siúd. Baol uirthi siúd fanacht ó chéilíochaí

Nár thuga tú do láimh glan ó do thóin leat ná do thóin ó na driseachaí le caoi a chur ar mo mhámh breá! Caithfidh mé athrú le mo pháirtí go mbeidh mé romhat ansin, agus gheobhaidh tú cothramacan síne na huaire uaimse ansin. Ní ligfidh mé an mámh féin thar mo dhoras gan snaidhm a thabhairt dó

An bhfaca tú an iarraidh a thug an bithiúnach do mo chuileata. Nár thuga tú do láimh glan ó do thóin ná do thóin ó na driseacha leat, muran tú atá tráthúil le do ghadhar i gcónaí. Cén bhrí ach mé taobh léithe. Chaithfeá, mo léan, a dhul ag fiachadh orm

Nach mé atá sáiteach ab ea? Ní dheachaigh mé fút fós anocht nár thug tú an buille feill dom. Nár thuga tú do láimh glan ó do thóin leat ná do thóin ó na driseachaí, gan dochar gan díobháil do mo chuid cártaíse!

Diabhal an féidir go bhfuil siad cluiche aríst. Chuaigh sibh faoi dhris uair eicínt roimh a theacht isteach daoibh

Is leo aríst — is leo a mh'anam. Chuir sibh an nathair talúna iontu; sin nó chuaigh duine eicínt agaibh faoi dhris tráthnóna. Ach dhá dtapaínnse mo ghnaithe, bhí sé fánach agaibh an cluiche sin a gnóthachtáil. Bhí mise rórighin sa tabhairt. Sin é a d'fhága mo chosa nite

Tá bua imeartha againn anocht ach d'éireodh dhúinn. Chuaigh mo pháirtí — P. anseo — faoi dhris ansin thíos i Logán an Fh. shula tháinig muid isteach. Ní bheidh aon oíche beo feasta nach ndéanfaidh duine againn an rud céanna. Is maith sportha a bheas sibh faoi Fhéil Pádraig seo chugainn ach a gcaitear suas na cártaí

Ní chinnfeadh Cearrbhach na Súgán orthu seo anocht. Tá siad ag dul cluichí fúthu agus thartu. Faoi dhris a chuaigh na healaíontóirí sin

Ní raibh mórán call do dhuine a bheith faoi dhris le gnóthachtáil ansin anocht. Ar ndóigh na himreoirí a bhí istigh níorbh fhiú cnaipe gan chos iad. Dheamhan cúig ná cárta a gheobhaidís dá mbeidís ag an gclár go ceann míosa. Ag caitheamh mámh ar bith a fhaigheas siad i dtraipisí. Sin é a ndeis ó tháinig oíche

Mura ndeachaigh tú faoi dhris tá asarlaíocht eicínt agat le na cártaí. Cén t-ádh atá ort go dteagann cóisir mhámhasaí agat i gcónaí agus chuile dhuine eile feidheartha. Bí san airdeall air ansin a Sh. faitíos a gcuirfeadh sé scailp iontu. Poc amach iad

Deir siad idir shúgradh agus dháiríre go ndeachaigh M. faoi dhris. Chonaic cuid dhíobh sin soir é dhá dhéanamh — siar sna taltaí gleannacha siúd ar chúla an tí. Hé brí céard a rinne sé nó nach rinne (ndearna), níor bhuach aon duine ariamh air. Nuair a shuífeadh M. isteach ag clár na himeartha, b'fhearr do chuile dhuine eile an uair sin éirí uaidh. Ghnóthódh sé ar Rí na Méaracán. Is minic a chonaic mise é

Tá muide ar an mbun chreidim. Ach mura dté muid fhéin an cluiche, ní ligfidh muid an bun amach agus beidh geábh eile air. Bainfidh muid deatach asaibh ansin. Is muid atá deas air! Chuaigh muid faoin dris anocht. Tá ádh imeartha orainn

'Sí an dris de ghearrchaile is measa a chonaic mé ariamh í. Níl ort ach méirín fhliuch a leagan uirthi agus beidh sí éirithe agat ina stoithneachán

Ná bain léithe sin chor ar bith. Dris cheart í sin le araoid ar bith a chur uirthi. Chonaic mé thíos sa teach an oíche cheana í, agus dheamhan bean ní ba mheasa ná í nuair a d'iarr a máthair uirthi a dhul i gcoinne aistir uisce. 'Breá nach n-iarrfadh sibh é sin,' adeir sí shular shuigh mé síos. 'Nach mé an trua Mhuire agaibh, maidin is tráthnóna.' B'fhearr léi suí síos chois an tine ag breacadh a loirgne ná éirí suas ag déanamh a gnaithe

'Sé an dris chéanna ag abhlóireacht i gcónaí é. Ní raibh ann an tráthnóna faoi dheireadh ach gur thug bodóg le P. Mh. sracadh thar claí ina chuid coirce, agus thosaigh sé ag gabháil le buile. Cén bhrí dhá mbeadh foghail déanta aici, ach ní raibh

Diabhal bréag nach dona an áit a bhfuil a chosa dhá thabhairt. Ní dhéanfaidh sé mórán tíochais leis an dris sin. Ach ní fiú biorán í le hais na máthar. Ach a dtosaí an bheirt acu ag gabháil dó, is fear réidh é … Ní phósfainn í, dhá bhfaighinn dúiche an C. bronnta orm léithe

Ara dris de chantalóir a bhí ann chuile lá ó rugadh é! Deile. Ar ndóigh nuair a bhí muid ina (ár) mbríthin (bíthin) óg fadó, agus muid ag caitheamh dairteachaí le chéile ar na portaigh théis an dinnéir, mo chroí ná raibh ag an diabhal go spréachfadh sé dhá mbuailtí scraith air

Ar ndóigh, ní fhéadfadh aon duine aon cheo a iarraidh ar an dris bhradach sin. B'fhéidir go bhfaightheá leat é ar sheol na braiche ach níor dhóichíde sin ná é a dhul in do phíobán, dhá n-éiríodh leis múisiam ar bith a bheith air ach a ngabhfá aige

Tá tú in do dhris chantalach ansin ar leic an teallaigh ó mhaidin agus gan gair ag aon duine eile an tine a thaobhachtáil agat. Is óg atá tú ag tabhairt drochfhaisean faoi deara duit féin. Má leanann duit, caithfear an teach a fhágáil ar fad fút féin. Ní bheidh aon ghair ag aon duine eile seasamh leat. Diabhal gair muise

Chinnfeadh ar chailleach éisc aon cheart a bhaint di siúd. Bheadh sé fánach aici. Tá sí chomh cantalach le dris

Is maith an chiall agamsa é más in é do scéal. Cúigear acu agam agus chaon duine acu ag baint farasbarr den cheann eile. Tá siad chomh cantalach le dris. Tá a fhios ag mo chroí go bhfaigheann siad an tslat scaití, ach má fhaigheann féin is beag an mhaith sin. Bíonn siad chomh dona ar an toirt aríst agus a bhí siad ariamh

Má tá siad chomh cantalach le dris muis, ní fhaca muide mórán dá gcuid cantail, agus bhídís isteach is amach againn chuile oíche le bliain. Feictear domsa nach bhfuil cor ná car iontu

Ní sheadóidh cailín ar bith sa teach sin. Cén chaoi a bhféadfaidís: paicle pháistí ann atá chomh cantalach le dris. Nach bhfuil an mháthair féin thar bharr a céille acu, ní áirím cailíní. I leaba a bheith dhá ngreasáil an fhad is a gheofaí teas ina gcraiceann

Ní raibh mac an aoin bheo istigh ar an mbaile sin ariamh nach raibh chomh cantalach le dris. Is agamsa atá a fhios sin ón am a mbínn in mo bhuachaill ag M. S. Murach chomh maith agus a bhí mé ar mo mhaidí, is minic a gheobhainn daite é. Faltanas ar bith dhá mbíodh acu do Mh. S. ormsa a d'ídídís é, i ngeall go mba mé ba mhinicí a chastaí ina mbealach

Dá mbeadh sí chomh cantalach le dris, bainfear ceart di ansiúd deirimse leat. Tá an phrioc de mháthair atá ansiúd in ann coc achrainn a choinneáil lena rogha duine. Agus deir siad nach gcoinneodh sí coinneal don inín. Caile cheart í sin. Agus ar ndóigh an spliota de mhac siúd ann, chuirfeadh sé dhá chrígh Mhuire thrína chéile. Meas tusa nár mhór do bhean a chasfaí isteach ina lár sin a bheith ina hamhas críochnaithe leis an gceann is fhearr a fháil orthu sin

Siúd í an dris chosáin i gcónaí. Ar an toirt agus a n-iarrfaidh tú tada uirthi buailfidh cantal ar an toirt í, agus tá sé chomh maith dhuit éirí as ansin

Ag an diabhal go raibh sé murab é an dris chosáin i gcónaí é. Cantalóir bradach a éireos chun drochmhúineadh leat ar an bpointe. Níl aon ghair ag aon duine tada a dhéanamh ina thimpeall sin. Nach mbainfidh sé an mhaith as chuile shórt dá mbeidh fút a dhéanamh lena chuid glámhóide

Ní fhaca muid ariamh í nach ina dris chosáin a bheadh sí nuair a thiocfadh an crú ar an tairne. Bhí sí thoir ansin an oíche sin — oíche chleamhnais — agus ní raibh sí sásta leis an bpósadh, agus ní raibh sí sásta an cleamhnas a chaitheamh in aer; agus ní bheadh a fhios ag aon duine faoi na brait céard ba chor di, nó céard a dhéanfadh sí

Sin é an dris chosáin má fhéadann sé tada a chur as daoibh le abhlóireacht agus glaomaireacht. Ach ná tugaidh aird ar bith air. Beidh sé ar an gceird sin le sibh a chur dhá (bhur) mbuille. 'Sé a mbeadh uaidh, dhá bhféadadh sé sibh a chur ar gcúl

Níor shíl muid tada a dhéanamh ar an mbaile ariamh nach mbeadh sé sin ina dhris chosáin i gcónaí romhainn. Nuair a d'fhéach muid le na dá ghabháltas a thabhairt d'aon duine amháin anseo, ba mhór leis go mbeadh an méid sin maitheasa orainn, agus chuaigh sé d'aon uaim ag cur suas le P. a chuid féin a choinneáil. Anois aríst nuair a bhí an tseanbhean ag teacht againn, ba mhór leis na deich scilleacha dúinn agus chuaigh sé siar de mhaoil a mhainge le droch-cháil a thabhairt orainn di. Nár agraí Dia air é. Ní fhéadfadh muide a bheith buíoch dó ar chaoi ar bith

'Sí Sasana an dris chosáin. Deile. Go mbuailtear Sasana, ní fheicfidh tusa aon lá suaimhnis ar fud an domhain. An bhfaca tú aon lá ariamh nach ag ullmhúchan scléipe a bheadh sí. Agus gheobhaidh sí na hamadáin ansin ar fud an domhain lena tarrtháil nuair a bheas sí i dteannta. Níl agat ach breathnú uirthi. Cé na fir fobhairne atá aici inniu …

Nach maith a chaithfeadh M. a bheith ina dhris chosáin. Ní fhéadfadh sé a theacht le comhar chomh maith le duine. Chuile lá ariamh ba in é a bhealach. Nuair a bheadh chuile dhuine sásta a theacht suas ar aon fhocal amháin, chaithfeadh seisean a scéal féin a bheith aige. Ar chuala tú ariamh é: fear i mbaile nó baile i bparóiste

Bhí an cine céanna — Clainn Mhac C. — ina ndris chosáin ar mhuintir an bhaile seo ariamh. Ní raibh gair acu a dhul siar nach mbeidís éirithe rompu le dual na droinne a bhualadh orthu, agus ar an gcóir chéanna dá dtéidís soir idir ord agus inneoin