Nuair a thosaigh sé ag dul chun drochmhúineadh, tháinig cúr lena bhéal, agus mhaithfeá do Dhia gan a bheith ag breathnú air. Bhí a dhá shúil ag dul amach as a cheann le scéin

Is furasta leis an gceann céanna a dhul chun drochmhúineadh. 'Sé a bhfuil le déanamh agat, do mhéir a ardú mar sin leis agus tá sé splanctha ar an toirt

Má thosaíonn sé ag dul chun feirge chomhairleoinn duit gan fanacht ina ghaire, arae tá anam duine air ina chuid oilc

D'áitigh an capall ag broimseálacht agus ag dul chun meargántachta agus shíl mé nach gceansóinn chor ar bith í. Tá sí chomh giongach leis an diabhal nuair a fheicfeas sí bus, agus ní ghlacann sí scáth roimh na mótair bheaga chor ar bith. Nach aisteach sin anois

Má labhraíonn tú air sin rachaidh sé chun stuaice air, agus ní bheidh focal den chaint aige aríst go ceann coicíse. Tá sé an-phusach go deo

Tá sé ag dul chun staince ar an mbodach seo aríst. Ní dhéanfaidh sé aon cheo faoi shásamh aríst go faoithin. Ní dóichíde cleas dhá ndéanfadh sé anois ná an láí a chaitheamh i dtigh diabhail ansin ar fad agus lascadh leis soir ag an S.

Ná téadh sé chun bundúin aríst ort fearacht ar ball. Breá nach mbeadh foighid agus éisteacht agat. Is fada dhuit do shaol ar an gcaoi a bhfuil tú

Chuaigh sé chun staiciúlachta (fc. staiciúlacht) uirthi, agus ní fhéadfadh muid aon cheart a bhaint di aríst go ceann dhá lá. Nach diabhlaí an bealach atá léithe do bhean óg a fuair oiliúint agus tógáil chomh maith léithe

Tá sé ag dul 'na huaire móire air. Ligidh dó ar fad anois, agus ná scanraidh tuilleadh é i gceann mar atá sé (fc. uair mhór)

Chuaigh sé 'na huaire móire críochnaithe air nuair a chonaic sé an póilí

Ní féidir gur ag dul chun drogaill atá tú. Más ea, ná bac leat féin. Shíl mé go raibh misneach thairis sin agat

Chuaigh sé chun drogaill air nuair a chonaic sé gach is a raibh le déanamh

Tá mé ag dul chun drogaill anois roimh an aistir sin. Sílim go bhfuil an tabhairt rófhada

Sílim go ndeachaigh tú chun bréige ó d'imigh tú ó bhaile — tucarach do bhréaga

Tá sé ag dul chun imní air

Ná téadh sé chun imní ort anois chor ar bith. Beidh sé anseo gan mórán achair

Chuaigh sé chun leithid ar fad ó fuair an mac an poistín salach sin atá aige

Measaim nár mhór cromnasc a chur ar an ngamhain sin. Tá sé ag dul chun bradaíola

Chuaigh sé chun críonnachta agus chun gleacaíochta ó himríodh air fadó faoin airgead. Ní bhfaighfear chomh bog aríst é go ceann fada sílim

Má théann sé siúd chun díocais ceart leis an obair, ní bheidh aon cheo di gan déanamh faoi cheann dhá lá

Bhí sí an-ligthe léithe fhéin, ach shílfeá go bhfuil sí ag dul chun cuibhiúlacht le scaitheamh. Theastaigh sin uaithi má tá féin

Gabhfaidh sé chun drabhláis ar fad má ghníonn tú sin leis. Nach mb'fhearr dhuit cead a chinn a ligean leis faoi láthair go bhfeice tú leat

Tá sé ag dul chun teanntáis anois ar na daoine

Is mór a chuaigh sé chun díth céille ón am nach bhfágfadh sé an splainc amach aon oíche beo. Ní féidir a choinneáil istigh anois

Tá na daoine ar fad ag dul chun gangaide thar is mar a bhídís fadó

Nach thú atá ag dul chun simplíochta. Cheal nach mba léir dhuit nach raibh sé ach ag séideadh fút. Bíodh a fhios agat gurb in é an méid

Shílfeá duine atá chomh fada san áit anois leis go rachadh sé chun tíriúlacht thairis siúd. Ach dheamhan athrú air thar an gcéad lá a dtáinig sé, ná cuid d'athrú

'Sé an chaoi a ndeachaigh sé chun ciotaíola ó d'imigh sé

Is beag a chuaigh sé chun gnaíúlacht, a Thiarna, ó d'éirigh an t-airgead leis. Níl a fhios agam nach ag dul chun tútaíl féin atá sé

Gabhfaidh sí chun dodaíola má théann duine cuideáin dhá bleán

Is mór a chuaigh sé chun siléige ó phós sé

Ag dul chun leisce atá tú chuile lá. Is gearr nach ligfidh an leisce dhuit an tine a thógáil de chois duine

Ní fhaca tú aon duine ariamh atá ag dul chun cúthaileadais ach í, théis chomh teann agus a bhí sí nuair a bhí sí ina páiste

Ag dul chun cantail aríst. Is mór an tseanmóir thú, is mór sin

Ná lig dó a dhul chun taighd, nó caithfidh sé anuas a bhfuil sa teach

A Dhia dhá tharrtháil! Bhí an cunús seo thiar ag an aifreann inniu. Is cosúil go bhfuil sé ag dul chun diagantachta faoi dheireadh agus faoi dhó (dheoidh). Is fhearr go deireanach ná go brách, arsa tusa

Chuaigh sé chun faitís orm nuair a chonaic mé a raibh acu ann, agus gan sméaróid ag ceachtar acu le ól

Mura dté sé chun coimhthís leatsa ó tharla nach bhfuil aon aithne aige ort. Is fhearr dhuit mise a ligean aige

Chuaigh an garraí sin chun broimfhéir ar fad anuraidh, rud ab annamh leis, agus ní raibh aon fhata de rath air — rinne sé broimfhéar

Má fhágann tú mar sin é, agus gan na clascannaí a thógáil, gabhfaidh an geadán talúna sin ar fad chun fiántais

Chuile ghreim dhá n-itheann sé sin téann sé chun maitheasa dó. Is furasta a aithinte air é, bail ó Dhia air!

Chuaigh sé chun saibhris go mór ó cheannaigh sé an talamh thuas

Tá sé ag dul chun suime duit féin chomh maith liomsa (fc. suim)

Bhíodh sé sin an-cholgach ag éirí suas dó, ach tá sé ag dul chun míne (míneadais, chun míneacht) go mór le gairid

Beidh an bealach ag dul chun míne anois as seo amach. Tá an bealach garbh uileag scoite agat

"Chuile líne ag dul chun míne agus chun bréige"

Chuaigh sé chun sochair (chun leasa, chun maitheasa, chun tairbhe srl.) dó an méid sin scíthe a fháil

Chuaigh an lá chun meirbheadais ó chaith sé an múirín gréine sin

Chuaigh sé buille chun fuaicht le scaitheamh

Tá sé ag dul chun fuaicht go mór

Chuaigh an aimsir go mór chun donacht le seachtain

Beidh an uair ag dul chun cruais anois chuile lá feasta

Tá sé ag dul chun gileacht (gile) shílfeá. Is gearr go n-éirí an ghealach

Cén fanacht atá oraibh: ag ceapadh go ngealfaidh an oíche. Nach ag dul chun duibheachta atá sé

Gabhfaidh sé chun báistí cheapfainn

Chuaigh sé chun fliucháin an t-am seo anuraidh. Neartaigh an toirneach leis

Ag dul chun drochuaire atá sé le chuile chor. An dtáinig a leithide d'aimsir ó rugadh an chéad fhear? Drochsheans go dtáinig

Is gearr go dté sé chun cailm aríst. Tá sé ag ligean faoi beagán cheana

Ag dul chun seaca atá sé. Sháraigh an oíche anocht a dtáinig fós

Is mór atá an uair ag dul chun ceo shílfeá

Dhá dtéadh sé chun ceo ort ar na cnoic sin, bhí do chnaipe déanta. Ní changlófá aon fhata le do mharthain aríst

Is cosúil le tráthnóna é a rachadh chun gála

Chuaigh an lá chun breáichte ó am dinnéir

Tá an lá ag dul chun síneadh — ag dul chun faid

D'aithneofá ar an tráthnóna cheana féin go bhfuil sé ag dul chun síneadh

Is fada a bheadh an aimsir seo ag tarraingt shula ghabhfadh sé chun breáichte

Tá tú ag dul chun feabhais bail ó Dhia ort!

Chuaigh sé chun laige ó chonaic mise cheana é

Dhá mhéad dhá bhfuil sí ag dul chun laige, níl aon cheo ar a teanga fós, ná dheamhan é

'Sé an chaoi a bhfuil sé ag dul chun lúid ó fuair sé an pinsean. Is mór a tharraingeos sé sin dhe, tá mise ag rá leat

Is breá a chuaigh an lao sin chun cruais le mí

Is mór a chuaigh mé chun deiridh le cupla bliain, ach tá aois mhór agam anois

Tá an bhó sin ag dul chun deiridh

Ní dheachaigh fataí mórán chun tosaigh ó tháinig an spalpadh seo

Ní rachaidh duine ar bith chun tosaigh le cneámhaireacht

'Sé an chaoi a bhfuil tú ag dul chun bacaíola tuilleadh chuile lá. Dúradh leat a dhul roimh an gcois sin, ach ba bheag an mhaith sin. Tá rud ar a shon anois agat

Tá sé ag dul chun buíocha (buíchte) chuile lá dhá bhfuil dhá chaitheamh

Daighean (dheamhan, diabhal) mé gur ag dul chun míshlaicht atá sí. Níl ainnis ar bith anois inti, té (cé) go raibh sí maith go leor agus í ina girsigh

Tá an teach ag dul chun sailíochta aríst, théis m'anró dhá ghlanadh agus dhá sciúradh

Tá an bhodóig sin ag dul chun raimhreacht ó doireadh í

Is mór a chuaigh tú chun téagair (chun toirte) le cupla bliain

Is mór a chuaigh an mhóin seo chun troimeacht ó cuireadh i gcruaich í. Ach d'éireodh dhi. Fuair sí neart na báistí

Beidh na cosáin ag dul chun boigeacht anois as seo amach. Duine ar bith nach bhfuil a chuid móna amuigh aige anois, tá sé réidh lena cur amach

Má fhágann tú ansin é faoin mbáistí gabhfaidh sé chun tibhe (chun tiúcht, chun tibheacht)

Chuaigh tyreannaí chun gainneachta ar fad le leathbhliain anois. Nuair a bhí siad bunfhairsing féin, ní bhfaightheá tyre gan lán laidhre

Shílfeá go mba cheart d'uibheachaí a beith ag saoirsiú feasta ó tá siad ag dul chun fairsingeachta. Ach níl aon chosúlacht orthu fós, pé acu sin é

Dhá fhada dhá bhfágfaidh tú é, is amhlaidh is mó a rachas sé chun leithid (poll)

Tá sé ag dul chun seacht mbliana anois — seacht mbliana go Féil Pádraic seo chugainn ó cuireadh í. Cuimhním go maith go raibh muid thiar sa roinnín ag déanamh na huaighe agus go ndeachaigh D. S. tharainn síos ag iarraidh mallach feamainne

Bheadh sé ag dul chun míosa sílim ó bhí sé anseo go deireanach. Thug sé cúl ar fad dúinn théis nár chuir muid araoid ar bith air, ach bhíodh na gearrchailí ag déanamh bothae críochnaithe dhó (dhe)

Ó, tá sé ag dul chun deich mbliana fichead ar chuma ar bith. Tá a fhios agam go maith nach raibh ionam féin agus in T. Sh. ach seanghasúir agus muid thíos ann. Is gearr an mhoill a bhíos ar na blianta chor ar bith

Tá sé ag dul chun ráithe ó gheall sé go dtiocfadh sé lá liom ag caoladóireacht agus go dtabharfadh sé beairtín slat agam as a shail féin ag teacht dó. Ní fhaca mé aon amharc air fhéin ná ar an mbeairtín ó shin, agus ní fheicfidh ach oiread chreidim. Sin é an dea-ghealladh agus an droch-chomhlíonadh i gcónaí. Tá na cléibh gan déanamh fós

Ba bheag an aois a bhí chor ar bith aige. Má bhí sé ag dul chun dá scór, ba é a chlochneart é. Cailleadh óg go leor é an duine bocht. Ach sin é an chaoi a mbíonn sé: níl a fhios cé is túisce craiceann na seanchaorach ar an bhfraigh ná craiceann na caorach óige

Tá sé achar is faide ná sin cheapfainn. Sílimse go bhfuil sé ag dul chun deich míle. Is maith buan an choisméig é ar aon chor. Cuimhním gur shiúil mé lá é …

Tá sé thar am a íoctha ar chaoi ar bith. Cá'il an té a d'éistfeadh leat dhá bhliain ach é féin; agus tá an t-airgead sin amuigh le dhul chun dá bhliain. Agus níor chuir sé aon éileamh ariamh air. Is fiú é sin rud a fhágáil aige, ní hé sin don phuicéara de shiopadóir atá i mbéal an dorais aige

Tá sí san easpaicil (ospidéal) anois le dul chun bliain go leith agus níl aon mhaith fós uirthi, ná aon chaint air. Tá faitíos orm nach dtiocfaidh sí beo as choíchin

Níor bhlais mé d'aon deoir anois le dul chun trí bliana — ón uair a bhí mé ag troid ar an aonach agus ar tógadh mé. Ní bhlaisfead ach an oiread, le cúnamh Dé. Níor bheag dom an t-achar ar chaith mé ag blaiseadh dó dhá mbeadh neart air

"Ach Páras a dhul chun réitigh le Úna Dheas Ní Nia" — socrú (pósta) a dhéanamh léithe